អន្តរជាតិ៖ កីឡាការិនីបាល់ទាត់វ័យ ១៥ឆ្នាំសញ្ជាតិអាហ្វហ្គានីស្ថានម្នាក់បានលើកឡើងថា ការភៀសខ្លួនចេញពីប្រទេសកំណើតរបស់ខ្លួន វាពិតជារឿងដ៏គួរឱ្យឈឺចាប់មួយ ប៉ុន្តែដើម្បីសុវត្ថិភាព និងដើម្បីបំពេញក្តីស្រមៃរបស់ខ្លួនក្នុងនាមជាកីឡាការិនីបាល់ទាត់អាជីព។ នេះគឺជាការលើកឡើងរបស់យុវតីម្នាក់ ក្នុងចំណោមយុវតីមួយក្រុមដែលជាកីឡាការិនីបាល់ទាត់ និងចាកចេញពីប្រទេសអាហ្វហ្គានីស្ថានទៅកាន់ព័រទុយហ្គាល់ ក្រោយក្រុមសកម្មប្រយុទ្ធតាលីបង់បានចូលកាន់កាប់ និងដឹកនាំរដ្ឋាភិបាល។

យុវតីជាច្រើនបានបន្តថា ពេលនេះពួកនាងមានសុវត្ថិភាព និងសេរីភាពហើយ។ គោលបំណងនៃការមកដល់ទឹកដីព័រទុយហ្គាល់នេះ គឺការចាកចេញពីភាពភ័យខ្លាច និងព្យាយាមអភិវឌ្ឍន៍ខ្លួនក្លាយជាកីឡាការិនីបាល់ទាត់អាជីពនាពេលអនាគត ហើយគ្រប់ៗគ្នាក៏បានលើកសរសើរពីគំរូនៃកំពូលកីឡាករព័រទុយហ្គាល់ Cristaino Ronaldo ផងដែរ។ យុវតីភាគច្រើនក៏មានបំណងត្រឡប់ទៅប្រទេសកំណើតដែរ ប៉ុន្តែក្នុងលក្ខខណ្ឌដែលពួកនាងអាចរស់នៅបានដោយសុវត្ថិភាពនាពេលខាងមុខ។

កន្លងមក ក្រោយចូលកាន់កាប់រដ្ឋាភិបាលភ្លាមៗ ក្រុមតាលីបង់បានសន្យាថានឹងគោរពនូវសិទ្ធិមនុស្ស ជាពិសេសផ្តល់នូវសេរីភាព និងសមភាពសម្រាប់ស្រ្តីក្នុងសង្គម ប៉ុន្តែយោងតាមបទពិសោធពីអតីតកាល ចន្លោះការដឹកនាំរដ្ឋាភិបាលលើកដំបូងនៅឆ្នាំ១៩៩៦ ដល់ឆ្នាំ២០០១ ស្រ្តីពុំត្រូវបានផ្តល់ឱកាសឱ្យបំពេញការងារក្នុងសង្គមឡើយ ខណៈក្មេងស្រី និងយុវតីត្រូវបានហាមឃាត់មិនឱ្យទៅសាលារៀនផងដែរ។ ដោយឡែក ក្នុងជីវភាពរស់នៅប្រចាំថ្ងៃវិញ ស្រ្តីត្រូវបានគេបង្ខំឱ្យឃ្លុំមុខជិតៗ និងតម្រូវឱ្យមានសមាជិកគ្រួសារជាបុរសនៅជាមួយជានិច្ចរាល់ពេលចាកចេញពីផ្ទះទៅខាងក្រៅម្តងៗ។

ប្រធានក្រុមបាល់ទាត់នារីអាហ្វហ្គានីស្ថាន Muhtaj បានធ្វើដំណើរទៅជួបយុវតីវ័យក្មេងទាំងនោះដល់ទីក្រុង Lisbon ប្រទេសព័រទុយហ្គាល់ ខណៈនាងបានបញ្ជាក់ថា ការជម្លៀសពួកគេចេញពីប្រទេសអាហ្វហ្គានីស្ថាននាពេលនេះ គឺដើម្បីបំផុសស្មារតី និងជួយបំពេញក្តីស្រមៃដល់យុវតីទាំងនោះឱ្យអាចលេងនូវកីឡាដែលពួកគេពេញចិត្តបាន៕